கர்நாடக மாநிலம் பெங்களூருவில் கடந்த வெள்ளி அன்று
கனமழை வெளுத்து வாங்கியது. கெங்கேரி, ஆர்.ஆர்.நகர், வித்யாபீடா, உத்தரஹள்ளி, கோனன்குண்டே, பசவனகுடி, குமாரசாமி லேஅவுட் உள்ளிட்ட பகுதிகளில் அதிகப்படியான மழை பெய்தது. பத்மநாப நகர், தத்தாத்ரேயா லேஅவுட், கோரமங்களா, ஹெச்.எஸ்.ஆர் லேஅவுட் உள்ளிட்ட பகுதிகளில் இடுப்பளவிற்கு மேலாக தண்ணீர் ஓடியது. இதில் இருசக்கர, நான்கு சக்கர வாகனங்கள் அடித்துச் செல்லப்பட்டன. பல்வேறு பகுதிகளில் வீடுகளுக்குள் தண்ணீர் புகுந்தன. இதனால் தத்தளித்த மக்களை பேரிடர் மீட்பு படையினர் பாதுகாப்பாக மீட்டு வந்தனர். நகரின் பல்வேறு பகுதிகளில் 13.2 மில்லிமீட்டர் மழை பெய்துள்ளது.
கெம்பகவுடா சர்வதேச விமான நிலையம் பகுதியில் 7.7 மி.மீ, ஹெச்.ஏ.எல் விமான நிலையம் பகுதியில் 1.3 மி.மீ மழையும் பதிவாகியிருப்பதாக இந்திய வானிலை ஆய்வு மையம் தெரிவித்தது. அடுத்த இரண்டு நாட்களுக்கு பெங்களூருவில் கனமழைக்கு வாய்ப்பிருப்பதாக தெரிவிக்கப்பட்டுள்ளது. இந்த சூழலில் வெள்ள பாதிப்புகள் தொடர்பான ஆலோசனை கூட்டத்தில் கலந்து கொண்ட முதல்வர் எடியூரப்பா, மழை வெள்ளத்தால் பாதிக்கப்பட்ட பகுதிகளில் செய்ய வேண்டிய அடிப்படையான விஷயங்கள் குறித்து ஆலோசனை நடத்தினார். சம்பந்தப்பட்ட அதிகாரிகள் உடனடியாக மறுசீரமைப்பு பணிகள் மேற்கொள்ள உத்தரவிட்டார்.
கனமழையால் வீடுகள் பாதிக்கப்பட்ட குடும்பங்களுக்கு தலா ரூ.25,000 நிவாரணம் வழங்கப்படும் என்று அறிவித்தார். முன்னதாக மழையால் பாதிக்கப்பட்ட ஹொசகெரஹள்ளி பகுதியில் முதல்வர் எடியூரப்பா ஆய்வு மேற்கொண்டார். அப்போது அவருடன் வருவாய்த்துறை அமைச்சர் ஆர்.அசோக் மற்றும் மாநகராட்சி அதிகாரிகள் உடனிருந்தனர்.
ஒரு மழைக்கே மூழ்கிருச்சு; அப்போ பருவமழைக்கு – மூச்சுத் திணறும் பெங்களூரு!
பின்னர் செய்தியாளர்களிடம் பேசிய முதல்வர் எடியூரப்பா, மழையால் பாதிக்கப்பட்ட பகுதிகளில் அமைச்சர்கள் ஆய்வு மேற்கொள்வர். வெள்ளத்தால் தங்களது வீடுகள் பெரிதும் பாதிக்கப்பட்ட குடும்பத்தினருக்கு ரூ.25,000 நிவாரணம் வழங்க முடிவு செய்துள்ளோம். இதற்கான காசோலை சம்பந்தப்பட்ட நபர்களுக்கு அளிக்கப்படும் என்றார்.
வருவாய்த்துறை அமைச்சர் அசோக் கூறுகையில், மீட்பு பணிகள் முழு வீச்சில் நடைபெற்று வருகின்றன. பெங்களூரு கனமழையால் ஏற்பட்டுள்ள சேதம் குறித்த விவரங்களை எங்களது அதிகாரிகள் சேகரித்து வருகின்றனர் என்று கூறினார்.
Source link
